Posts

Stilel tal-passat: Beppe Furino

Mument emozzjonanti f’Villar Perosa

F’Villa Perosa tiġġedded kull sena tradizzjoni li timmarka parti sostanzjali mid-dna Juventin. Qatt ma kienet sempliċi partita ta’ ħbiberija. Fl-antik din kienet tkun l-ewwel ħarġa tal-istaġun. Illum m’għadux hekk u f’din dejjem iktar iddominata mill-flus, f’Villa Perosa xorta, waħda għadna nduqu togħma ta’ futbol iktar ġenwin u pur kif kien fil-passat sa mill-oriġini stess tal-logħba. Fil-partita tal-lum laqatna ritratt li jfisser ħafna. Fir-ritratt naraw lil Bonucci jgħannaq lil Beppe Furino li wara l-problemi ta’ saħħa li kellu jinsab issa fuq siġġu tar-roti. Bonucci tah il-flokk tiegħu, ġest mill-aktar sabiħ. F’dik it-tgħanniqa hemm żewġ captains li taw ħafna lil Juventus. Furino apparti li lagħab għal snin twal ma’ Juventus, wara li rtira kien anki maħtur biex imexxi l-Youths ta’ Juventus bħala manager tas-‘settore giovanile’. Villar Perosa, Furino jafha sew. Li llum kien hemm minkejja l-problemi ta’ saħħa li kellu u li għandu, jixhed kemm verament Furino għandu għal qalbu lil Juventus. U f’dik it-tgħanniqa ta’ Bonucci hemm xi ftit jew wisq l-imħabba u r-rikonoxximent tal-poplu Juventin għal dak kollu li għamel Furino għal Juventus.

Matthew Scerri

Furino. L-ewwel persunaġġ Juventin li qatt żar il-Club tagħna!

Se nieħdu silta oħra mill-ktieb “Iswed u Abjad” biex infakkru meta Giuseppe Furino kien żar il-Club tagħna:

Iż-żjara ta’ Beppe Furino

Sa mill-ewwel mumenti tal-ħajja tal-klabb il-membri kienu dejjem jitolbu lill-Kumitat li jaqtgħu x-xewqa tagħhom li jiltaqgħu f’pajjiżna mal-persunaġġi l-kbar tal-istorja Bianconera. Din il-ħolma saret realtà f’Lulju tal-1980, eżattament fis-sena li matulha kien qed jiġi ċelebrat il-ħames anniversarju mit-twaqqif tal-klabb. Dakinhar, fuq stedina tal-Kumitat, kien ġie Malta l-captain ta’ Juventus, Beppe Furino. Fil-memorja ta’ dawk kollha li għexuha, dik tibqa’ okkażjoni kbira u li ma tintesa qatt, l-aktar għaliex Furino kien personalità mill-aktar importanti għall-partitarji ta’ Juventus.

Furino kien l-ewwel persunaġġ Juventin li aċċetta l-istedina tal-Kumitat u kemm dam fostna kien milqugħ bil-kbir, tant li baqa’ impressjonat bil-laqgħa li kellu f’Malta, u lura f’Turin kellu kliem ta’ tifħir għall-organizzazzjoni kbira tal-Juventus Club (Malta).

Ferm impressjonanti u organizzata b’mod eċċellenti kienet l-ikla ad unur Beppe Furino li saret f’waħda mil-lukandi ewlenin ta’ pajjiżna nhar il-5 ta’ Lulju u li fiha l-captain Juventin, wara li rringrazzja lil kulħadd għall-ospitalità kbira murija lejh u lejn il-familja tiegħu fil-ftit jiem fostna, irregala l-flokk Iswed u Abjad lill-President Tony Dimech.

Biż-żjara ta’ Furino jingħalqu l-ewwel ħames snin tal-klabb. Snin li raw lill-klabb jikber b’mod impressjonanti minkejja d-diffikultajiet ta’ dawk iż-żminijiet. Kien jidher ċar li l-klabb il-ġdid kien inbena fuq bażi aktar soda minn dik tas-Snin Sittin u li kien se jkollu ħajja twila u glorjuża b’kisbiet importanti kemm fix-xena lokali, kif ukoll fir-relazzjonijiet ma’ barra minn Malta.

Profil ta’ plejers mill-passat: Beppe Furino

Imwieled f’Palermo fil-5 ta’ Lulju 1946, Furino jibqa’ magħruf għall-grinta tiegħu fil-grawnd u l-kapaċità li kellu li jibqa’ jiġri u jissielet fil-grawnd għal disgħin minuta sħaħ. Mhux ta’ b’xejn li l-President Boniperti kien jindikah bħala mudell jew aħjar eżempju għall-plejers l-oħra meta kien jgħidilhom: “Tridu tilagħbu bil-qalb bħalma jagħmel hu.”

Fl-1975, meta twaqqaf il-Juventus klabb Malta, Furino kien diġà ilu sena jġorr il-faxxa ta’ captain. Essenzjalment hu baqa’ captain ta’ Juventus sal-1984 meta temm il-karriera tiegħu wara ħmistax-il sena jilbes il-flokk tal-kbar ta’ Juventus. Minn età żgħira, fl-ewwel snin tal-adolexxenza tiegħu, Furino kien jifforma parti mis-settur taż-żgħażagħ ta’ Juventus. Intbagħat għal xi snin intbagħat jimmatura ma’ Savona u ma’ Palermo, sakemm fl-1969 Juventus ħaduh lura magħhom.

Mal-Bianconeri hu kiteb paġni kbar ta’ suċċess u llum jibqa’ magħruf għall-fatt li rebaħ tmien kampjonati fil-karriera tiegħu, rekord assolut għall-futbol Taljan li hu jaqsam ma’ Giovanni Ferrari, Virginio Rosetta, Alessandro Del Piero u Gigi Buffon. Apparti t-tmien kampjonati, Furino rebaħ il-Coppa Italia darbtejn, kif ukoll it-Tazza Uefa (1977) u t-Tazza tat-Tazzi (1984). Dawn kienu l-ewwel unuri ta’ Juventus fix-xena internazzjonali. Lagħab ukoll żewġ finali tat-Tazza taċ-Champions iżda qatt ma rebaħha.

(Silta meħuda mill-ktieb “Iswed u Abjad. L-40 Anniversarju mit-Twaqqif tal-Juventus Club DOC Vero Amore (Malta 1975)” ta’ Manwel Scerri u Matthew Scerri)