Hekk se jilgħabu illejla Juventus-Udinese
Qed inwasslulkom kif il-gazzetti ‘La Gazetta dello Sport‘ u ‘Tuttosport‘ qed jimmaginaw li Juventus u Udinese se jinżlu fil-grawnd fil-logħba tal-lum. (bidu 8.45pm).
Posts
Juventus mhux se jappellaw
Fi stqarrija maħruġa ftit tal-minuti ilu, naqraw li Juventus mhux se jappellaw għad-deċiżjoni tal-Uefa. Juventus tennew li mxew b’mod korrett u mhux se jappellaw sabiex ma jkunx hemm inċertezza għat-tim. Juventus qed jaċċettaw id-deċiżjoni biex jingħalaq dal-kapitlu u t-tim ikun seren tul dan l-istaġun mingħajr preokuppazzjonijiet dwar deċiżjonijiet dixxiplinari li jkunu jistgħu jxejnu dak li jkun miksub fil-grawnd.
Matthew Scerri
Uffiċjali: Juventus maqlugħa ‘l barra mill-Conference League
L-Uefa ħabbret li Juventus ġew esklużi għal sena waħda mill-kompetizzjonijiet Ewropej u weħlu multa ta’ 20 miljun Ewro minħabba li kisru t-termini tas-settlement agreement iffirmat f’Awissu tal-2022. Juventus, għaldaqstant, mhux se jitħallew jikkompetu fil-Conference League dis-sena. 10 miljuni mill-multa mogħtija jkunu jridu jitħallsu biss jekk fit-tliet snin li ġejjin Juventus ma jkunux konformi mar-regolamenti tal-Uefa.
Matthew Scerri
Kif se jkun imqassma l-karigi amministrattivi fi ħdan Juventus
Għada jew it-Tlieta Juventus mistennija jħabbru li Cristiano Giuntoli ffirma kuntratt magħhom sal-2028. Hu se jkun il-Kap tal-‘Area Sport’ u se jkun responsabbli mit-timijiet kollha ta’ Juventus kemm il-kbar kif ukoll in-Next Gen u t-timijiet tal-youths.
Fi ħdan l-istruttura managerjali ta’ Juventus, Giuntoli se jkun qed ikollu fuqu lill-President Ferrero, liċ-CEO Scanavino u lid-Direttur Ġenerali Calvo li issa se jieħu ħsieb biss it-tmexxija amministrattiva u kummerċjali tal-klabb.
Fl-Area Sport se jkun hemm Giovanni Manna bħala Direttur għall-Isport tat-tim tal-kbar u se jibqa’ jkun hu li jmexxi n-negozjati għax-xiri u l-bejgħ tal-plejers.
Federico Cherubini se jibqa’ jaħdem għal Juventus minkejja s-sospensjoni. Xogħlu se jkun wara skrivanija jfassal il-proġetti għall-ġejjieni tal-klabb.
Marco Storari se jkun in charge mit-tim Next Gen, b’Claudio Chiellini jgħinu bħala Direttur għall-Isport. Id-Dipartiment tal-iscouting se jkun immexxi mill-ġdid minn Matteo Tognozzi u hawn ta’ min jgħid li Juventus beħsiebhom isaħħu l-iscouting b’aktar investiment ġewwa u barra l-Italja.
Niġu issa għas-settore giovanile jew aħjar it-timijiet tal-youths. Pessotto se jkun ikkonfermat bħala Kordinatur tat-timijiet kollha, filwaqt li Massimiliano Scaglia se jkun responsabbli amministrattivament mit-timijiet kollha miż-żgħar nett sal-Primavera.
Matthew Scerri
L-ewwel il-bejgħ!
Manna, assistit minn Tognozzi, bħalissa għaddej b’ħidma intensiva bil-għan li jirnexxilu jbigħ jew jislef il-plejers li kienu mislufin u li m’għadhomx parti mill-pjanijiet ta’ Juventus. Qed nirreferu għal plejers bħal Arthur, Zakaria, Kulusevski u oħrajn.
Il-bejgħ ta’ dawn il-plejers mhux se jkun faċli, ovvjament, anki għax uħud minnhom ġejjin minn staġun kemxejn deludenti. Hawn trid tidher il-bravura ta’ Manna u Tognozzi. Interess fil-plejers jidher li hemm u l-uffiċċjali ta’ Juventus iridu jkunu bil-għaqal biżżejjed biex dak l-interess jibdluh f’opportunità vera ta’ trasferiment.
Il-pjanijiet ta’ Juventus ma jieqfux hawn. Qed ikun irrapurtat minn diversi sorsi li Elkann ta istruzzjonijiet sabiex il-klabb inaqqas l-operational costs tiegħu u dan jinkludi anki għażliet li jwasslu biex jonqsu l-pagi tal-plejers fit-tim. Mhux eskluż li plejers b’paga għolja bħal Szczesny u Alex Sandro jinbigħu. F’din l-ottika rridu nifhmu anki, pereżempju, għala Juventus ma xtrawx lil Milik għal kollox bil-prezz maqbul sena ilu. Milik kien u għadu plejer li Juventus japprezzaw, imma x’aktarx iridu jixtruh għal somma inqas jew inkella jippruvaw iġeddu s-self tiegħu għal sena oħra.
Jista’ jkun ukoll li jinbigħu xi stilel tat-tim bħal Chiesa jew Vlahovic jekk tasal offerta tassew kbira (s’issa imma ma jidhirx li hemm għalihom offerti sensazzjonali). Hawn ta’ min jgħid li Chiesa għandu kuntratt li jiskadi fl-2025 u allura Juventus das-sajf iridu jifhmu jekk il-winger Taljan iridx iġedded il-kuntratt ma’ Juventus bil-kundizzjonijiet tal-Bianconeri jew inkella għandux miri oħra (jekk dan ikun il-każ allura issa hu l-aqwa żmien għall-bejgħ tiegħu!)
Kif għidna, l-ewwel il-bejgħ. Juventus bħalissa ma tantx jidhru li qed jinnegozjaw l-akkwist ta’ plejers ġodda. L-unika eċċezzjoni hu Frattesi li għalih Juventus diġà kellhom żewġ laqgħat ma’ Sassuolo. Hu meqjus is-sostitut ideali għal Rabiot, imma hawn irridu ngħidu li hemm xnigħat li Juventus offrew anki kuntratt ġdid ta’ sena lill-Franċiż bl-istess paga li kellu fl-aħħar snin. Apparti Frattesi ma nafux li Juventus realment qed jippruvaw jixtru lil ħadd iktar.
Il-bejgħ fiċ-ċentru tal-attenzjoni tad-diriġenti Juventini. Il-bejgħ u t-tnaqqis tal-operational costs. Qed tissemma minn diversi sorsi s-somma ta’ 120-130 miljun Ewro li Juventus iridu jiffrankaw dis-sena. Ħadd ma spjega minfejn ħarġet dis-somma jew kif ġiet ikkalkulata. Hi x’inhi s-somma li Juventus iridu jiffrankaw, li hu żgur hu li, kif kien beda jagħmel Arrivabene, qed jinbidel l-operat ta’ Juventus: daqshekk infiq bla rażan; daqshekk pagi għoljin; tmexxija iktar għaqlija mil-lat finanzjarju; u klabb li jimmira li jkun self-sustainable filwaqt li jibqa’ kompetittiv.
Matthew Scerri
Issa nafu kif ġew ikkalkulati l-10 punti
Ħarġet is-sentenza sħiħa tal-verdett tal-Qorti tal-Appell tal-FIGC li kien sab lil Juventus ħatja dwar l-hekk imsejħa plusvalenze fittizji. Il-kundanna kienet ta’ tnaqqis ta’ 10 punti għal Juventus fil-klassifika tas-Serie A. Issa nafu li l-10 punti tnaqqsu b’relazzjoni mal-kundanna tal-eks uffiċċjali Juventini. 4 punti tnaqqsu minħabba l-kundanna ta’ Paratici, 3 punti minħabba li Andrea Agnelli nstab ħati, 2 punti minħabba Arrivabene ġie kundannat u punt ieħor minħabba li anki Cherubini nstab ħati. Total 10 punti. Kienu għaxra u mhux iktar ħmistax għax Nedved u membri oħra tal-Bord tad-Diretturi ġew meħlusa mill-akkużi tagħhom.
Matthew Scerri
Mitlub tnaqqas ta’ 11-il punt fil-konfront ta’ Juventus!
Dalgħodu beda tinstema mill-ġdid il-kawża tal-plusvalenze fittizji. Il-Prosekutur Chine’ talab li Juventus jiġu kkundannati għal 11-il punt imnaqqsa fil-klassifika. Barra minn hekk ġiet mitluba sospensjoni ta’ 8 xhur għal seba’ uffiċċjali ta’ Juventus (Garimberti, Grazioli Venier, Hughes, Marilungo, Nedved, Roncaglio, Vellano). Infakkru s-sentenza ta’ Agnelli, Arrivabene, Cherubini u Paratici huma definittivi wara li ġiet ikkonfermata mill-Collegio di Garanzia tal-CONI. Ta’ min ifakkar li f’Jannar li għadda, fuq dan l-istess każ, Chine’ kien talab tnaqqis ta’ 9 punti għal Juventus.
Din hi t-talba ta’ Chine’. Issa jmiss li l-avukati ta’ Juventus jagħmlu l-intervent tagħhom ta’ difiża lill-klabb Juventin. Illejla mistennija toħroġ is-sentenza tal-imħallfin. Il-kawża qed terġa’ tinstema quddiem l-istess tribunal li kien qata’ s-sentenza f’Jannar li għadda, biss l-imħallfin huma differenti.
Matthew Scerri
Juventus jingħataw lura l-15-il punt (għalissa)
Il-Collegio di Garanzia tal-Coni ddeċieda li l-kawża tal-plusvalenze fittizji għandha terġa’ ssir. Il-Collegio laqa’ għaldaqstant dak li talab l-Prokuratur Ġenerali, Taucer. Juventus, tajjeb infakkru, kienu qed jitolbu li s-sentenza tiġi annullata. Il-kawża trid issa terġa’ tinstema u eventwalment jista’ jkollna verdett ta’ natura oħra minn dak li kellna f’Jannar. Fi kliem ieħor Juventus jistgħu jinħelsu mill-akkużi jew, jekk jerġgħu jinstabu ħatja, ikunu kkundannati għal piena li tista’ tkun differenti minn dik ta’ Jannar (jistgħu jeħlu multa biss jekk ikun applikat l-Artiklu 31 jew inkella tnaqqis ta’ punti jekk ikun applikat l-Artiklu 4).
Kienu kkonfermati s-sentenzi a dannu ta’ Andrea Agnelli, Paratici, Cherubini u Arrivabene. Nedved kien meħlus mill-akkużi. Il-kawża li se terġa’ ssir trid tistabilixxi r-responsabbiltajiet tal-uffiċċjali u sussegwentement tiddetermina f’kien is-sehem ta’ Juventus f’din l-istorja kollha.
Il-Collegio di Garanzia għandu xahar biex joħrog id-dokument fejn jispjega għala ttieħdet din id-deċizjoni. Minn meta joħroġ dad-dokument, il-Ġustizzja Sportiva jkollha xahar żmien biex l-kawża tinstema. Ta min ifakkar ukoll li jekk is-sentenza tasal sat-30 ta’ Ġunju, din tkun tgħodd għal dan l-istaġun. Sentenza wara l-1 ta’ Lulju jkun ifisser li s-sentenza tkun tgħodd mill-istaġun li jmiss.
Intant għalissa Juventus ħadu lura l-15-il punt tagħhom u telgħu fit-tielet post tal-klassifika tas-Serie A b’59 punt, żewġ punti taħt Lazio u sittax-il punt taħt Napoli.
Matthew Scerri
Instema’ l-Appell quddiem il-Collegio di Garanzia tal-Coni. Ma naqsux is-sorpriżi!
Illum quddiem il-Collegio di Garanzia tal-CONI nżammet is-seduta li matulha ġie diskuss l-appell imressaq minn Juventus wara li tnaqqsulhom 15-il punt fil-klassifika minħabba l-hekk imsejħa ‘plusvalenze’ fittizji. Is-seduta ħadet madwar tliet sigħat. Juventus talbu li s-sentenza tiġi annullata, filwaqt li l-Prokuratur Ġenerali Ugo Taucer (l-akkuża biex niftehmu) talab li l-kawża terġa’ ssir mill-ġdid peress li hemm xi affarijiet nieqsa fil-motivazzjoni tas-sentenza. Fi kliem ieħor skont il-Prokuratur Ġenerali, il-Qorti naqset milli tagħti spjegazzjoni ċara u dettaljata dwar l-aspetti kollha li wasslu għas-sentenza u għaldaqstant qed jitlob li l-kawża terġa’ ssir. Interessanti li l-Prokuratur Ġenerali minflok ma ddefenda s-sentenza u talab li tkun ikkonfermata, talab minflok li l-kawża terġa’ ssir milli ġdid. Jekk it-talba tiegħu tkun milqugħa, il-ħmistax-il punt għalissa ma jitnaqqsux lil Juventus. Imbagħad la jerġa’ jistema’ l-każ quddiem il-Ġustizzja Sportiva, Juventus ikunu jistgħu jiġu meħlusa mill-akkużi u allura ma jeħlu xejn. Iżda, jekk jinstabu ħatja, ikunu jistgħu jeħlu l-istess piena (tnaqqis ta’ 15-il punt) jew waħda differenti (tnaqqis ta’ inqas jew iktar punti minn dawk il-ħmistax-il punt, jew inkella multa biss).
Id-deċiżjoni tal-Collegio di Garanzia tal-CONI mhix mistennija toħroġ il-lejla. Li hu żgur hu li t-talba tal-Prokuratur Ġenerali tixhed dak li dejjem sostnejna: ma kienx kollox sew fis-sentenza ta’ Jannar li għadda! Taucer stess ammetta llum waqt is-seduta li jara li d-difiża għandha raġun li tilmenta għall-fatt li Juventus ġew ikkundannati fuq il-bażi tla-Artiklu 4. Fl-istess ħin Taucer indika li l-15-il punt imnaqqsa mhumiex spjegati sew.
Matthew Scerri